SIUDAT DI GUATEMALA, AP.- Un trailer i un bùs a dal djasabra mardugá riba un karetera na Guatemala, lagando un saldo di por lo ménos 21 morto, inkluyendo nuebe menor di edat i lagando diferente persona herida.
E bomberonan voluntario a informá na periodistanan ku e echo a sosodé 172,5 kilometer leu di karetera CA-9, na nortost di e kapital. Fiskal a bisa ku e kantidat di morto a oumentá na 21 persona. Diesocho persona a muri na e sitio di e perkanse i tres mas a fayesé den un sentro médiko.
Segun vershon di testigunan, e trailer tabata koriendo demasiado duru i a dal kontra e bus den un bògt. Fiskal a kuminsá investigashon di e kaso. E bosero di fiskal, Julia Barrera a bisa ku Ministerio Públiko ta trahando na e sitio di e perkanse i ku e shofùrnan involukrá a wòrdu detené.
Segun testimonio di un ayudante di e shofùr di bus, e shofùr di e trailer tabata fuma i a purba hui di e sitio, pero personanan den serkania a logra par’é.
