NAIROBI, KENIA, AP.- Por lo ménos 50 persona a fayesé djárason na momentu ku e bùs kaminda nan tabata biaha aden a sali for di riba kaminda, bòltu i dal na wèst di Kenia. E dak a kita kompletamente for di e vehíkulo, segun outoridat a informá.
E 15 sobrebibientenan di e bùs, ku a biaha desde Nairobi rumbo pa e lokalidat oksidental Kakamega, a wòrdu tratá den hospitalnan di lokalidat Kericho, segun informashon di e hefe di polis regional di Valle di Rift, Francis Munyambu.
E aksidente a pasa alrededor di 4 or di djárason mardugá i entre e mortonan tabatin shete mucha, asina el a agregá.
“E informashon ku nos tin ta ku e shofùr a pèrdè kontròl”, asina e hefe di polis di Kericho, James Mugera a bisa na The Associated Press.
E bùs no tabata outorisá pa sirkulá anochi i e doñonan mester duna un splikashon riba esaki, segun e hefe di polis di tráfiko regional, Zero Arome. “Loke a pasa ta un gran desgrasia i sigur lo tuma medidanan”, asina el a sigurá.
Kenia ta pasa den vários problema pa redusí e kantidat kresiente di aksidente di tráfiko, kontra un oumento den kompra di vehíkulonan di e klase medio den e pais.
