PORT-AU-PRINCE, AP.- Por lo ménos 34 persona a muri i 17 a resultá heridá djadumingu mardugá na momentu ku un bùs a kore drenta un multitut serka di e siudat haitiano di Gonaives, segun informashon di organismonan di reskate.
E vehíkulo, ku tabata biaha di Cap-Haitien pa e kapital, a dal dos persona pará na parada di bùs promé i na momentu ku e kier a hui el a dal den un grupo di persona ku tabata partisipando den un festival. Asina Joseph Faustin a deklará, kende ta un koordinador di defensa sivil den provinsia di Artibonito, kual ta keda na Gonaives.
E aksidente a tuma lugá alrededor di 3’or di djadumingu mardugá, segun splikashon na The Associated Press.
Despues di e insidente, vários di e personanan ku tabata partisipá na e festival a ataká e bùs i a purba sende esaki na kandela. Polis a kontrolá e situashon i a hiba algun pasahero pa stashon di polis pa asina protehá nan.
Faustin a splika ku outoridat ta investigando e kousa di e aksidente. E shofùr di e bùs a sobreviví e aksidente i a hui di e sitio.
