TORONTO, CANADA, AFP.- Canada lo manda kuater tanki adishonal di kombate pa Ukrania, duplikando su kompromiso i lo sanshoná 192 persona i entidat ruso, segun indikashon di e promé minister Justin Trudeau.
“Canada a mustra solidaridat ku Ukrania desde komienso di e konflikto”, asina e premier a bisa den un konferensia di prensa riba e aniversario di e invashon i Rusia den Ukrania i el a añadí ku “nos lo sigui hasi esaki”.
E sanshonnan nobo ta kontra legisladornan ruso ku a respaldá e invashon di Ukrania, inkluyendo e vise promé ministernan, ministernan i otro miembronan di e gabinete di Putin, su sektor militar i di defensa, inkluyendo famianan di personanan ku ya ta riba e lista di sanshon di Canada.
E atministrashon di Trudeau a bisa ku kuater tanki di kombate di Leopard 2 di fabrikashon aleman a keda entregá na Polonia, kaminda sòldatnan ukraniano ta hañando training pa usa esaki.
Aparte di e kuater tankinan nobo di kombate Leopard 2, Canada ta mandando un vehíkulo antibala i tambe munishon.
E pakete nobo di yudansa i sanshon a keda anunsiá na momentu ku Merka a anunsiá un serie di sanshon kontra Rusia.