HALIFAX, NOVA SCOTIA, AP.- Shete mucha di un famia sirio ku a yega Canada dos aña pasá a muri djamars mardugá den un kandela. Testigunan a bisa ku e kandela a destruí e kas rápidamente den un bario na Halifax.
Danielle Burt, un bisiña, a bisa ku e muchanan tabata di un famia ku edat entre 3 luna i 17 aña.
Un hòmber i un muhé a wòrdu interná den hospital i e hòmber su kondishon ta grave.
Den un entrevista desde e hospital, e iman Abdallah Yousri, di Sentro Islámiko Ummah di Halifax, a bisa riba Facebook ku e famia ta di Raqqa, Siria.
E famia tabatin kasi dos aña na Canada, segun Yousri a bisa.
E promé minister Justin Trudeau a ekspresá su konsternashon riba Twitter. “Mi sintimentunan ta ku e sobrebibientenan di e kandela horibel na Halifax”.
Polis a bisa ku ta investigando kousa di e kandela.
E hefe di Halifax Mike Blackburn a bisa ku e kandela tabata hopi intenso na yegada di e unidatnan. Apesar di esaki, e bomberonan a logra kontrolá e kandela aki rápidamente.
E bomberonan tabata profundamente afektá pa loke nan a mira.
