BEIJING, AP.- E kantidat di kasonan konfirmá relashoná ku un vírus nobo ku a bolbe oumentá na China, miéntras ku e sifra di morto a yega 811 persona, inkluyendo un merikano. Partido Komunista a wòrdu akusá ku morto di un dòkter ku a wòrdu menasá pa polis despues di purba alertá e pueblo tokante e enfermedat mas di un luna pasá.
Beijing a anunsiá ku 3.399 persona a wòrdu diagnostiká ku e enfermedat den e último 24 oranan ku a pasa, oumentando e kantidat total di kaso na China kontinental na 34.546.
E embahada di Merka na Beijing a reportá ku un siudadano merikano di 60 aña tambe a muri. El a wòrdu diagnostiká na Wuhan, e episentro di e brote. E merikano a fayesé djárason.
E pasaheronan di diferente krusero a enfrentá mas problema despues ku Hapon a reportá tres kaso mas pa un total di 64 persona riba e barku Diamond Princess, kual ta den karentena ku 3.700 pasahero na bordo. Un otro barku a wòrdu prohibí di ankra na e pir. E presidente di China, Xi Jinping, a papia ku Donald Trump i a pidi vários pais pa “reakshoná responsablemente” kontra e brote, mirando ku mayoria nashon ta reakshoná di forma eksaherá, restringiendo entrada di biaheronan chines.
