CARACAS, AP.- Presidente Kolombiano Juan Manuel Santos a ekspresá djaluna, ku Colombia ta dispuesto na otorgá asilo na eks fiskal venezolano, Luisa Ortega Diaz, kende a yega Colombia dia 18 di ougùstùs ku su kasa, e diputado disidente di ofisialismo, German ferrer. Outoridatnan di Venezuela a ordená su detenshon pa dirigí un ret di ekstorshon di Fiskal.
Santos a agregá atraves di su kuenta di Twitter ku Ortega Diaz por konta ku protekshon di su gobièrnu.
E anunsio a tuma lugá tres dia despues ku e ofisina di migrashon di Colombia a konfirmá ku e fiskal destitui i su kasa a yega e pais den un buelo priva ku a Sali di Aruba.
Kansier venezolano, Jorge Areaza a reakshoná na e postura di gobièrnu di Bogota, katalogando esaki komo “siniko”. El a afirmá ku ta trata di un medida ku ta “protehá korupshon i delito den Venezuela” i ku Bogota a kombertí den sentro di “konspirashon kontra demokrasia i pas den Venezuela”.
E pareha a bandoná Venezuela algu despues ku Asamblea Konstituyente, integrá pa partidarionan di presidente Nicolas Maduro,a aprobá pa kita inmunidat di Ferrer i outorisá Tribunal Supremo di Hustisia pa sentensi’é pa delitonan desde labamentu di plaka te ekstorshon.
