JOHANNESBURG, AP.- Rebeldenan di Repúblika Demokrátiko di Congo a mata 15 sivil i sekuestrá desena di muchanan den un atake den un region kaminda tin un brote mortal di ébola aktualmente. Asina ehérsito di e pais a informá djadumingu na momentu ku e violensia ta menasá ku para labornan krusial pa kontené propagashon di e vírus.
E rebeldenan di Aliado di Forsanan Demokrátiko a ataká puestonan militar di Congo i vários besindario di e siudat di Beni djasabra i djadumingu segun e kapitan Mak Hazukay Mongha a bisa na The Associated Press.
Furioso ku e asesinatonan, e residentenan di Beni a transportá kuater kadaver na alkalde di e siudat riba djadumingu mainta. E vehíkulonan di e organisashonnan di yudansa di e mishon di pas di Nashon Uní a wòrdu tira ku piedra.
E rebeldenan di FDA a mata sentenar di sivil den e último añanan i no solamente un di e vários insurgentenan ku ta aktivo na nortost di Congo.
Den e brote aktual, deklará riba promé di ougùstùs, a registrá 200 kaso konfirmá di ébola, inkluyendo 177 morto.
