SIUDAT DI GUATEMALA, GUATEMALA, AFP.- Siudadanonan di dos munisipio di Guatemala a enfrentá polisnan ku a lansa gas lakrimógeno pa disolvé e protestanan pa supuesto apnormalidatnan den elekshon general di djadumingu último, segun indikashon di outoridatnan.
E insidentenan a sosodé na San José del Golfo, na nortost di e kapital, unda e votashon a keda suspendé, inkluyendo San Martín Zapotitlán, na sùit di Siudat di Guatemala, segun e entidat elektoral.
“Nos a tuma e desishon pa sera e sentronan di votashon permanentemente” na San José del Golfo, segun indikashon di e presidente di Hunta Elektoral Departamental di Guatemala, Álvaro Bravo, den un rueda di prensa.
El a splika ku Tribunal Supremo Elektoral (TSE) mester determiná “ora i kon pa hasi e votashonnan den e munisipio ei”.
E insidentenan a kuminsá den oranan di djadumingu mardugá na momentu ku algun bishitantenan a blòkia busnan ku tabata transportá votadónan di otro sitionan pa nan vota na San José del Golfo, segun dirigentenan di oposishon.
No ta konosí si e manifestantenan ta forma parti di partidonan polítiko òf no.
