PHILADELPHIA, MERKA, AFP.- Dos tiroteo nobo a laga por lo ménos sinku morto i mas di 20 herido e fin di siman aki na Merka, alimentando un ola di violensia armá, miéntras Kongreso ta buska akuerdonan pa restringí akseso na arma di kandela.
E tiroteonan, riba djasabra anochi na Philadelphia i djadumingu mardugá na Chattanooga, Tennessee, a bolbe sakudí e pais ku ta enfrentando un epidemia di violensia armá ku ya a kobra bida di míles di merikano e aña aki.
Na Philadelphia, deskonosínan a basha bala riba un multitut lagando tres morto i 12 herido, segun indikashon di polis.
E komisario di polis di Philadelphia, Danielle Outlaw, a bisa ku un di e víktimanan a bringa ku un otro hòmber, kual posiblemente tabata kousa di e tiroteo. E otro víktimanan tabata personanan inosente, asina el a agregá.
Dieskuater persona a haña bala i a keda hospitalisá. A deklará dos hòmber i un muhé morto na momentu ku nan a yega hospital ku vários herida di bala.
E tiroteo na Chattanooga, na sùit di estado di Tennessee, a laga dos morto i 12 herido. Un persona a muri i dos mas tabata herida despues ku outo a alkansá nan na momentu ku nan tabata hui di e esena, segun indikashon di e hefe di polis Celeste Murphy. “Vários” víktima ta den estado kritiko, asina el a agregá.
Murphy a añadí ku tabatin mas ku un atakante den e insidente ku a sosodé den un diskotèk den sentro di e siudat di 180.000 habitante.
Presidente Joe Biden a pidi Kongreso pa restringí benta di armanan di asalto, el a kritiká e republikanonan ku a oponé i a bisa ku skolnan i hospitalnan a “kombertí den kamponan di bataya”.
