PARIS, FRANSIA, AFP.- Mal Tempu den gran parti di Fransia a laga un morto, diessinku herido i 15.000 kas sin koriente, segun indikashon di outoridatnan djadumingu.
“Tabatin 15 herido, dos di nan grave i un persona a muri na Ruan”, asina e minister di Interior, Gerald Darmanin a anunsiá.
Den siudat di Ruan, un muhé di 30 aña a muri pega bou di un vehíkulo despues ku un koriente di lodo a lastr’é bai kuné, segun indikashon di e minister.
Entre e dos heridonan grave tin un adolesente di 13 aña ku ta den estado kritiko, segun indikashon di Darmanin na prensa.
Alrededor di 2.400 bombero a realisá 3.500 intervenshon di ousilio. Segun Darmanin “ta promé biaha den 20 aña” ku un parti importante di e teritorio franses a wòrdu afektá simultáneamente pa e mal tempu.
Alrededor di 15.000 kas no tabatin koriente djadumingu mainta.
