NASHON UNI, AP.- E presidente kolombiano Ivan Duque a bisa djárason ku e tin prueba “kontundente” di e supuesto sosten di Nicolás Maduro su gobièrnu na gruponan kriminal i teroristanan ku ta operá na Venezuela pa atentá kontra Colombia.
E mandatario a afirmá ku e lo entregá un informe di 128 página na e organismo kual ta “kontené prueba ku lo demostrá e komplisidat di Nicolás Maduro su régimen ku kartelnan terorista ku ta atentá kontra e pueblo kolombiano”.
Duque a denunsiá ku Venezuela ta sostené guerianan kolombiano, pero e no a duna ningun detaye spesífiko manera esnan ku el a menshoná durante di su diskurso.
E kansier venezolano Jorge Arreaza a bisa ku e diskurso di Duque lo desepshoná e kolombianonan dor ku e no a enfoká riba e problemanan grave ku su pais ta pasando aden. El a usa Venezuela komo “kortina di huma” pa distraé.
E denunsia di Duque ta forma parti di un serie di akshon destiná pa preshoná e gobièrnu pa trese kambio na Venezuela.
