QUITO, AP.- Korte Nashonal di Ecuador a pidi kaptura internashonal di e eks presidente ekuatoriano Rafael Correa komo parti di un proseso pa sekuestro di un eks legislador di oposishon.
Hues Daniela Camacho a akohé e pedido di fiskal general i a tuma e desishon aki despues ku e eks mandatario, residensia na Bèlgika aktualmente, no a kumpli ku e òrdu tribunal di presentá desde 2 di yüni kada 15 dia na Quito komo medida preventivo di e proseso hudisial.
Correa a akudí e konsulado na Bèlgika djaluna, pero Korte Nashonal no a aseptá e akshon aki, kual no tabata den kumplimentu ku e òrdu anterior.
E abogado di e eks mandatario, Caupolican Ochoa, a sigurá ku “no ta trata di trese hustisia pero pa kousa bèrgwensa”.
E eks legislador, Fernando Balda a refugiá na Colombia, debí na tenshonnan kresiente ku su pais. Deskonosínan a purba sekuestrá Balda den luna di ougùstùs na aña 2012, pero el a logra skapa debí na intervenshon di un grupo di taksista ku a alertá polis i neutralisá e vehíkulo kual e polítiko ekuatoriano tabata aden.
Investigashonnan hudisial na Colombia a determiná ku tres agente di inteligensia di polis ekuatoriano a kontratá delinkuentenan komun, awor den prizòn, pa sekuestrá eks legislador Balda.
