CARACAS (AFP).- E diplomátiko Edmundo González Urrutia, designá komo susesor pa e lider opositor Maria Corina Machado, a aseptá su nominashon komo kandidato dje plataforma opositor mas grandi di Venezuela pa enfrentá e presidente Nicolas Maduro den elekshon di 28 di yüli.
“Mi ta aseptá e inmenso honor i e responsabilidat di ta kandidato di tur esnan ku ta deseá un kambio via dje sistema di elekshon. Un brasa fuerte pa e pueblo di Venezuela”, segun Gonzalez Urrutia a skibi den su promé mensahe públiko despues di konfirmá su kandidatura.
“Próksimamente lo mi dirigí mi mes na tur venezolano ku ta deseá un rekuperashon di e pais”, segun el a skirbi den su di dos publikashon riba e kuenta X.
Machado, faborito den e enkuestanan pero kende via korte a pèrdè derechi pa ehersé trabounan públiko, a ekspresá su sosten na e diplomátiko, kende tin mas ku un dékada trahando komo hòmber di strategia dje koalishon opositor mas importante dje pais.
“Nos ta uní i fuerte”, Machado a bisa. “Nos tin tarheta kaba i awor nos tin un kandidato ku ta keda apoyá pa uni tur, pa tur e partidonan polítiko, pa e siudadanonan ku ta deseá bon pa pais”, segun Machado.
E kandidatura di Gonzalez, di 74 aña, a keda disidí djabièrnè pa e koalishon Plataforma Unitaria Democrática (PUD), di manera unánime, despues di reunionnan ekstenso. E apoyo di Machado, kende a partisipá den e diskushonnan, ta fundamental. Awendia e ta e dirigente opositor mas popular despues di a bari den referendum di opositornan ku mas di 90% di voto.
E bloke di oposishon ta konsentrá forsa riba un solo kandidato pa enfrentá Maduro, kende lo buska un di tres mandato konsekutivo kontra di 12 kandidato, den su mayoria personanan ku ta kolaborá ku su gobièrnu.
