JARTUM, SUDAN, AFP.- “Ehérsito lo no partisipá den diálogo” nashonal organisá na Sudan, ouspisiá pa Nashonnan Uní i Union Afrikano (UA), segun indikashon di e general golpista Abdel Fattah al-Burhan, pa asina e sivilnan por forma “un gobièrnu ku personanan kompetente”.
E general a hasi e anunsio na televishon, miéntras sentenáres di sudanes a manifestá riba e di sinku dia konsekutivo na Jartum i den suburbio di e kapital pa eksihí pa retiro di e militarnan. Represhon di e manifestashonnan a laga 114 morto.
E general a anunsiá ku “despues di formashon di un gobièrnu, nos lo disolvé e Konseho Soberano i forma un Konseho Supremo di Forsanan Armá, kual lo inkluí paramilitarnan, na enkargo di solamente kuestionnan di “defensa i seguridat”.
Konseho Soberano, e outoridat di transishon máksimo di Sudan, a wòrdu formá na 2019, despues ku un “revolushon” a kondusí na retiro di e diktador Omar al Bashir, ku tabatin binti aña na poder.
Despues di esaki a forma un gobièrnu di transishon ku a inkluí sivilnan i militarnan, dirigí pa e ekonomista Abdala Hamdok. Pero 25 di òktober, un gòlpi di estado di general Burhan a pone fin na e repartishon di poder aki.
Desde e tempu aki tabatin manifestashonnan pro demokrasia tur siman. Por lo ménos 114 persona a muri violentamente desde e gòlpi, i sentenáres a resultá heridá durante represhon di e protestanan.
