COPENHAGEN, AP.- Un krusero ku a haña problema ku motor dilanti kosta di Noruega, tabata pa falta di zeta den e motornan. Asina e funshonario prinsipal di e pais a bisa.
E nivel abou di zeta tabata e “kousa direkto” pa e fayo den motor di e barku, lagando esaki sin por nabegá meimei di tormenta djasabra. e sensor nan a detektá e falta di zeta i a paga e motornan di Viking Sky outomátikamente, segun indikashon di Lars Alvestad, direktor general interino di Outoridat Marítimo di Noruega.
E emergensia di fin di siman a kousa ku vários persona a sali heridá, inkluyendo 36 persona ku mester a wòrdu interná den hospital. Kuater persona di tripulashon ta interná, inkluyendo unu den kuido intensivo pero ku kondishon stabil, segun outoridat di salú.
Viking Sky a terminá den un situashon peligroso, meimei di olanan fuerte despues ku su motornan a stòp di traha ku 1.373 pasahero i tripulante na bordo. Esaki a kousa ku e barku mester a emití un señal di emergensia. E reskate a tuma lugá ku yudansa di sinku helikòpter.
