BEIRUT, AP.- Prensa estatal di Siria a reportá ku e pais su defensa aéreo a reakshoná riba “un agreshon aéreo” israelí kontra e provinsia na nort di Alepo.
Segun medionan estatal, un funshonario militar a indiká ku e atakenan tabata kontra posishonnan den e zona industrial na nortost di Alepo. E funshonario, kual no a wòrdu identifiká, a señalá ku e defensa antiaéreo sirio a interseptá vários “misil di atake”.
E atakenan a sosodé miéntras e tenshon entre Israel i Siria ta oumentá dor di e desishon ku Merka a tuma pa rekonosé e kontròl di Israel riba Golan Heights, un teritorio ku e pais a kita for di Siria na aña 1967. E desishon a kousa un kondena internashonal i a kousa diferente protesta den Siria.
Israel a rekonosé ku e pais tabata atakando ophetivonan iraní na Siria den simannan resien. E último ofensivo a tuma lugá den yanüari.
Iran ta aliado di Damascus.
