BEIRUT, AP.- Kargando nan pertinensianan, un kantidat di muhé i mucha vinkulá ku kombatientenan di Estado Islámiko a bandoná un kampamentu na nortost di e pais, pa regresá nan kas. Nan a bandoná e sitio den trùk i bùsnan.
Un kantidat di 800 muhé i mucha a sali for di e kampamentu al-Hol, den provinsia di Hasake, djaluna atardi, segun indikashon di e funshonario kurdo-sirio, Badran Ciya Kurd i testigunan. Ta trata di e di dos grupo mas grandi ku ta bandoná e pais for di temporada ku EI a pèrdè kontròl teritorial na Siria den mart. Forsa Demokrátiko Sirio (FDS), respaldá pa Merka a kapturá Baguz, e último pueblo kontrolá pa ekstremistanan serka di frontera ku Irak.
E kampamentu al-Hol, kontrolá pa FDS, a wòrdu konstruí pa refugiá 10.000 persona, pero aktualmente e tin mas di 73.000 persona desplasá. 92% di nan ta muhé i mucha i 15% òf por lo ménos 11.000, ta ekstranhero, segun informashon di Nashon Uní.
E redukshon den al-Hol lo yuda mitigá e preshon ku tin riba organisashonnan di yudansa, kual a wòrdu abrumá pa e fluho di personanan desplasá durante e último lunanan ku a pasa.
EI a kontrolá kasi un terser parti di Siria i vários parti di Irak. E grupo a deklará un kalifato den e zonanan aki, kaminda miónes di persona tabata biba.
