BUDAPEST, AP.- Sambuyadónan a rekuperá un kadaver serka di e sitio kaminda un boto ku turista surkoreano a aksidentá siman pasá, despues ku esaki a dal kontra un krusero, segun informashon di outoridat di Hungria djaluna.
E agensia ku ta enkabesá e operashonnan di reskate a bisa ku e sambuyadónan húngaro a haña e kadaver den awa di riu Danubio djaluna mainta, na momentu ku tabata inspekshonando restunan di e boto. Sambuyadónan di Surkorea a trese e kadaver na superfisie. E pais ta yudando ku labornan di búskeda i reskate.
Segun konfirmashon, ta trata di un di e personanan involukrá den e insidente di djárason anochi. Ainda tin binti persona pèrdí.
E boto turístiko identifiká komo “Hableany” a dal kontra un krusero serka di e edifisio di Parlamento di Hungria.
E direktor di e agensia gubernamental na kargo di e koordinashon di búskeda i reskate a bisa ku diferente húngaro i surkoreano a partisipá den labornan di reskate.
“Nos lo hasi tur kos pero nos lo no drenta den restu di e barku. Esaki ta estriktamente prohibí”, segun Janos Hajdu. “Ta trata di un maniobra peligroso”.