MOSCOW, AP.- Rusia ta obligando Tinder pa entregá e datonan i mensahenan di su usuarionan na agensianan ruso di inteligensia, komo parti di e restrikshonnan ofisial tokante uso di internèt.
E Agensia Ruso di Supervishon di Komunikashon, e organismo ku ta regulá komunikashon na Rusia, a bisa ku Tinder ta inkluí riba e lista di servisio online ku mester entregá dato di su usuarionan na momentu ku e agensia di seguridat FSB i otro outoridat ruso pidi esaki.
Tinder, e aplikashon pa buska pareha, mester koperá ku outoridat ruso òf wòrdu blòkia kompletamente den e pais. e norma ta konta pa dato di usuarionan ku ta usa un server ruso.
Rusia a aprobá vários lei pa amplia su kontròl riba aktividatnan ku ta sosodé riba internèt. Entre otro kosnan, e kompanianan di internèt mester warda seis luna di dato di usuario i entregá esaki na momentu ku outoridat ta rekerí e informashon.
Outoridat ruso a emití un òrdu pa prohibí Telegram, un aplikashon di mensahe, despues ku e plataforma a ninga di duna dato di su usuarionan manera legislashon ruso ta rekerí. Algun funshonario ruso, inkluyendo e hefe di FSB, a ataká Telegram, argumentando ku “ekstremistanan” a usa e plataforma pa plania atakenan terorista.
Apesar ku outoridat a purba blòkia Telegram, ainda e aplikashon ta disponibel na Rusia.
E ret sosial LinkedIn tambe a purba resistí pero e no tabatin suerte.
