PARIS, AP.- Kuater persona a wòrdu detené relashoná ku un atake na Marseille kaminda dos muhé hóben a muri, segun informashon di polis franses.
Un fuente hudisial a bisa ku e kuater personanan ta detené pa sospecho di vínkulo ku un grupo terorista.
E fuente, ku a pidi pa keda anónimo, no a duna mas detaye.
Algu promé, Minister di Interior Gerard Collomb a bisá via e emisora France-Inter ku e agresor di e atake djadumingu tabatin residensia italiano i un pasport tunesio bálido. E atakante a wòrdu matá pa sòldatnan despues di e hinkamentunan, kual Estado Islámiko a tuma responsabilidat p’e.
Un di e shete identifikashonnan ku e atakante a usa den enkuentronan anterior ku polis franses tabata un pasport tunesio ku tabata identifik’é komo Ahmed H.
Djamars, un fuente hudisial a bisa ku outoridat a determiná ku esaki tabata e identidat berdadero di e atakante.
Fiskal italiano a kuminsá un investigashon di terorismo riba e sospechoso, identifiká pa prensa italiano komo Ahmed Hanachi. El a biba na Aprilia, na sùit di Roma, desde 2006 te 2014, segun e agensia di notisia italiano ANSA.
