EREVAN, ARMENIA (AFP).- E hefe di diplomasia franses, Catherine Colonna, di bishita na Erevan, ayera a anunsiá ku Paris “a duna su oké” pa e suministro di material militar na Armenia, ku ke protehá su mes kontra di Azerbaiyan.
“Fransia ta di akuerdo pa firma futuro kontraktnan ku Armenia pa posibel suministro di material militar pa nan por defendé nan mes”, el a deklará.
Colonna no a bisa presis ki tipo di material, pero a sigurá ku Fransia lo aktua “ku responsabilidat mutuo i sin pensa riba eskalashon dje situashon”.
El a bisa mas aleu ku Azerbaiyan, ku ta konta ku ingresonan petrolero i ku apoyo di Turkia, “no a stòp di arma su mes pa realisá akshonnan”.
Azerbaiyan den sèptèmber a logra un viktoria lihé kontra di separatistanan armenio di Nagorno Karabaj, kualnan Armenia no ker a yuda debí na temor di un guera nobo ku su bisiña.
Armenia, viktorioso di un promé guera den añanan 1990 despues dje fin di URSS, a keda derotá den 2020 den un di dos konflikto ku Azerbaiyan.
Armenia ta un aliado tradishonal di Rusia i normalmente ta arma su mes na Mòsku.
