PARIS, AP.- Algun pais a atvertí djabièrnè ku mundu a kombertí den un sitio mas peligroso despues ku Merka a mata e general di rango haltu di Iran, i ounke algun a pidi moderashon, Gran Bretaña i Alemania a sugirí ku ta Tehran mes a provoká e atake dirigí ku a kousa tenshon den Medio Oriente.
China, Rusia i Fransia, miembronan permanente di e Konseho di Seguridat di Nashon Uní no a duna un deklarashon kontundente tokante e atake aéreo ku a kobra bida di general Qassem Soleimani i vários sosio na aeropuerto di Baghdad djabièrnè mardugá.
Kas Blanku a bisa den un tweet ku Soleimani, na mando di Forsa Quds responsabel pa kampañanan iraní den estranhero, “tabata desaroyando diferente plan pa ataká algun diplomátiko i militarnan merikano na Irak i den e region kompleto”.
Preis di krudo a subi despues di e asesinato, reflehando e invershonistanan su intrankilidat pa ku stabilidat den Medio Oriente. Aparte di esaki tabatin diferente menasa di vengansa di parti di Iran.
“Nos a lanta awe den un mundu mas peligroso”, asina e vise minister di Eksterior di Fransia, Amelie de Montchalin a bisa den algun deklarashon na radio RTL.
E minister di Eksterior ruso a bisa den un komunikado ku “e akshonnan aki no ta yuda nos resolvé e problemanan kompliká den Medio Oriente”. Trump su atversarionan ta konsiderá e atake komo unu imprudente, ku e prekandidato demókrata di presidensia Joe Biden indikando ku e mandatario “a tira un bara di dinamit riba un barí di polvo”. China ta sumamente “preokupá”.
E asesor konservador di e lider supremo di Iran a kompará e sòldatnan merikano komo “bestianan insidioso” i a bisa ku nan mester wòrdu barí den e region.
