N’DJAMENA, CHAD, AFP.- E gobièrnu di Chad a anunsiá un toke de keda djaweps i a bisa ku e chokenan mortal entre polisnan i manifestantenan ku ta protestando kontra kontròl di militarnan na poder, a laga alrededor di 50 morto.
Sentenáres di manifestante a protestá den kapital di N’Djamena i otro siudatnan pa konmemorá e fecha ku e militarnan a primintí ku lo renunsiá, pa krea un gobièrnu sivil.
Promé minister di Chad, Saleh Kebzabo, a aktualisá e kantidat ofisial di morto na alrededor di 50 persona djaweps anochi i a bisa ku mayoria morto tabata na N’Djamena i siudatnan di Moundou i Koumra, i mas ku 300 persona a sali leshoná.
Gobièrnu a imponé un toke de keda entre 6 or di atardi i 6 or di mainta te ora establesé òrdu bèk den e fokonan di disturbio, asina el a añadí den un konferensia di prensa.
