TOKYO, HAPON, AFP.- E gobièrnu hapones a disidí ku lo prolongá e estado di emergensia den Tokyo i vários region mas den e pais te ku 31 di mei, dor di un oumento den kasonan di infekshon di COVID.
E medidanan aki ta ménos estrikto ku e ‘lockdown’ den otro paisnan rònt mundu, i ta na vigor desde fin di aprel i lo a ekspirá pa 11 di mei.
Aparte di Tokyo, e estado di emergensia ta konta den Osaka, Kioto, Hyoto i tambe departamentonan Aichi i Fukuoka, segun indikashon di promé minister Yoshihide Suga.
“E kantidat di kasonan nobo ta demasiado haltu den siudatnan grandi i hospitalnan ta bou di preshon den Osaka i Hyogo”, segun indikashon di Suga. “Pa motibu di esaki no a disidí ku lo agregá Aichi i Fukuoka den áreanan di estado di emergensia i ekstendé esaki te ku 31 di mei”, asina el a agregá.
E medida ta impliká ku lo sera bar i restorantnan temporalmente i prohibí benta di alkohòl. Aktualmente tur akontesimentu deportivo ta tumando lugá sin akseso pa públiko.
Hapon ta pasando dor di un ola nobo di infekshon, ku 5.300 kaso diario den un siman. Ounke e magnitut di e pandemia ta limitá kompará ku otro partinan di mundu, e krísis di salú ta afektando hospitalnan. Ademas, e kampaña di bakunashon ta kanando slou.
