CARACAS, AP.- Lidernan di oposishon Venezolano a kritiká Goldman Sachs Group Inc., pa kumpra bononan di Gobièrnu di presidente Nicolas Maduro.
Djadumingu, korant The Wallstreet Journal a reportá ku e banko a kumpra 2.800 mion dòler na bono den e estatal petrolero PDVSA pa un preis redusí.
E oposishon Venezolano a akusá e banko inmediatamente di apoyá e Gobièrnu impopular ku a wòrdu señalá di outoritario pa violashonnan di derechi humano i ku den último luna tabata reprimiendo protestanan riba kaya kasi diario.
Presidente di Asamblea Nashonal, Julio Borges, a akusá e institushon finansiero di ta respaldá pa diktadura i di violá su propio kódigo di étika.
Den un komunikado, e banko a rekonosé ku esaki a atkerí bononan, pero a bisa ku a haña esaki via merkado sekundario i no direktamente di e Gobièrnu Venezolano. E banko no a revelá kuantu el a paga pa e títulonan, pero Journal, a sita fuentenan anónimo, bisando ku e banko a paga 865 mion dòler pa papelnan ku balor di 2.800 dòler, pues 31 sèn pa kada dòler.
“Nos a invertí den bono di PDVSA paso manera mayoria otronan den e sektor di invershonista den rekursonan nashonal, nos ta kere ku e situashon di pais lo mehora ku tempu”, asina e entidat a bisa.
