PARIS, AP.- Un organisashon di defensa di konsumidó na Fransia a presentá un demanda kolektivo kontra Google, akusando e kompania di violá e normanan históriko di privasidat adoptá pa Union Europeo (UE) na aña 2018.
Den e demanda presentá den un korte di asuntu atministrativo na Paris, e organisashon UFC Que Choisir a pidi un kompensashon di 1.000 euro pa kada un di e 200 usuarionan di Google afektá te ainda.
Esaki ta un di e promé demandanan entablá kontra un kompania grandi di teknologia, konforme normanan nobo di UE konosí komo Reglamentu General di Protekshon di Dato.
Google a defendé su práktikanan.
“Nos tin un standart haltu di transparensia i konsentimentu den nos regulashonnan i nos ta ofresé informashon útil i kontròl di privasidat fásil relashoná ku nos produktonan”, segun e empresa a bisa den un komunikado.
E demanda ta identifiká Google Ireland i Google LLC. E organisashon aktivista ta afirmá ku e normanan di konfidensialidat di Google tin un ekstenshon di mas di 1.000 liña i ku e kompania no ta kumpli ku e eksigensianan di GDPR.
CNIL, e entidat ku ta monitòr privasidat na Fransia a eksihí pa Google paga un but di 50 mion euro konforme un demanda similar. Google ta apelando e desishon di CNIL.
