WASHINGTON, AP.- E potrèt di un migrante i su yu chikitu di kasi 2 aña ku a hoga den un intento pa krusa riu Bravo for di México pa drenta Merka sin outorisashon, a kousa empatia, indignashon i un ola di ekspreshon di angustia for di Vatikano te den Kongreso di Merka i kandidatonan di Kas Blanku.
E potrètnan ta mustra e kadaver di un hòmber i su yu muhé di kasi dos aña, boka abou na kantu di e riu. E brasa di e yu tabata tira riba e tata su garganta, un indikashon ku el a wanta na su tata te na final. E potrètnan publiká pa e korant mehikano La Jornada a wòrdu distribuí na nivel mundial pa The Associated Press.
Oscar Alberto Martin Ramirez i su yu muhé Valeria a hui for di El Salvador. E mama, Tania Vanessa Avalos, tabata na e banda mehikano di e riu i a sobrebibí.
E demókratanan di Kongreso a bisa ku nan ta spera ku e potrètnan ta traha riba konsenshi di Donald Trump su gobièrnu i preshoná e presidente pa suavisá su esfuersonan pa kompliká e migrantenan su esfuerso pa drenta Merka. E demókratanan ku lo postulá pa wòrdu skohé komo presidente di Merka a kritiká e polítika di migrashon di Donald Trump na Merka.
