BERLIN, ALEMANIA, AFP.- E hefe di Organisashon Mundial di Salú a pidi solidaridat global pa ku futuro vakunanan di Corona vírus, segun e kantidat di kasonan ta subiendo mundialmente.
Tedros Adhanom Ghebreyesus a bisa ku e úniko forma pa rekuperá di e pandemia ta si tur pais sigurá ku esnan mas pober ta haña akseso hustu na un vakuna.
“Mi kier bisa bon kla ku nashonalismo di vakuna lo prolongá e pandemia, no kontrolá esaki. Ta natural ku tur pais kier protehá nan siudadanonan pero mester hasi esaki efektivamente. I e mihó manera ta pa vakuná algun persona den tur pais, i no tur persona den algun pais”, asina el a bisa.
Sientífikonan rònt mundu ta trahando pa desaroyá un vakuna kontra COVID-19, kual a mata 1,1 mion persona. Union Europeo, Merka, Bretaña, Hapon i un kantidat di nashon mas ya a hasi pedidonan grandi ku kompanianan embolbí den desaroyo di un vakuna kontra Corona vírus.