LAS VEGAS, AP.- Un hòmber riba piso 32 den un hotèl na Las Vegas a tira kontra un konsierto di aire liber kaminda kasi 22.000 persona a asistí. Esaki a kombertí e anochi den un kampo di morto ku no tabatin masha opshon pa skapa. Por lo ménos 58 persona a fayesé.
Esaki ta e matansa di mas grave riba suela merikano den historia moderno di e pais. Polis a bisa ku kasi 515 persona a resultá heridá.
E motibu di e atake a kontinuá komo un misterio: “Mi no por posishoná mi mes den mente di un sikopata na e momentunan aki”, asina e hefe di polis Joseph Lombardo a bisa.
Esnan ku a asistí e konsierto a kore pa nan bida djadumingu anochi na otro banda di kaya di Mandalay Bay Hotèl and Casino despues ku nan a skucha algu ku tabata parse vürwèrk pero a resultá di ta zonidu di tiru.
Agentenan di SWAT a usa eksplosivonan pa drenta den e kamber di hotèl di e atakante i a mira ku el a kometé suisidio, segun indikashon di outoridat. E atakante a wòrdu identifiká komo Stephen Craig Paddock, di 64 aña, un penshonado di Mequite, Nevada, i tabatin por lo ménos 17 arma di kandela huntu kuné.
Estado Islámiko a atribuí na e atake. Sin embargo, e agente di FBI Aaron Rouse i otronan a bisa ku investigadornan no a mira nada ku ta vinkulá e atake ku ningun grupo terorista.
