TAIN-L’HERMITAGE, FRANSIA, AFP.- Un hòmber a dal presidente franses Emmanuel Macron moketa durante un bishitá na Tain-l’Hermitage.
Segun un video di e insidente publiká riba Twitter, Macron ta aserká un grupo di persona i kombersá ku un hòmber ku seguidamente ta dal e presidente un moketa.
Macron a bisa ku ta trata di un insidente ‘aisla’, kometé pa individualnan violento. Dos hòmber di 28 aña sin antesedente penal a keda detené segun indikashon di fiskal Alex Perrin.
Agreshon físiko kontra presidentenan franses no ta sosodé ku frekuensia.
Esun di mas grave den e último dékadanan ta di aña 2002, na momentu ku un militar derechista a purba asesiná Jacques Chirac durante e desfile militar di 14 di yüli.