TEGUCIGALPA, AP.- Merka i Honduras a finalisá tur paso nesesario pa implementá un akuerdo ku ta permití e gobièrnu merikano pa manda solisitantenan di asilo Honduras, segun informashon di Chad Wolf, e sekretario interino di Seguridat Nashonal merikano, durante un bishita na e pais sentroamerikano djaweps.
E implementashon lo kuminsá dentro di algun siman, asina el a agregá.
“Pa krea un kapasidat di asilo na Honduras di forma efisiente, nos tin plania di implementá den diferente fase, loke ta permití nos pa ekstendé e programa gradualmente miéntras nos ta traha riba e sirkunstansianan operashonal”, asina Wolf a bisa.
Wolf a elogiá e gobièrnu hondureño pa asumí un “responsabilidat humanitario”.
E reunion di Wolf ku e mandatario hondureño Juan Orlando Hernandez a wòrdu ehekutá miéntras Merka ta ekspandé su plannan pa manda solisitantenan di asilo pa Sentroamerika.