NEW YORK, AP.- Un hues federal a rechasá un petishon di e narkotrafikante mehikano famoso, Joaquin “El Chapo” Guzman pa su huisio wòrdu trasladá pa un otro sitio pa evitá e espektákulo públiko kreá pa medidanan fuerte di seguridat usá na momentu ku e ta wòrdu transportá pa korte.
E medidanan a inkluí seramentu di Brùg di Brooklyn pa e karavana polisial ku ta eskoltá Guzman pasa den e trayekto di un prizòn di seguridat haltu na Manhattan pa un korte na Brooklyn kaminda su huisio ta tuma lugá e aña aki.
Den un oudiensia djamars, hues Brian Cogan a rechasá e argumentonan di defensa di Guzman ku tur maniobra di seguridat por perhudiká e posibilidatnan di e akusado pa haña un huisio hustu i duna e públiko e impreshon ku e ta kulpabel di antemano.
E hues a bisa ku e lo no splika su motibunan pa ninga e petishon di trasladá e kousa pa Manhattan públikamente. El a bisa ku algun preokupashon logístiko ta e motibu pero en duna detaye.
Guzman, ekstraditá pa Merka aña pasá, a deklará inosente di kargonan denunsiando ku su kartel a laba miónes di dòler i a efektuá un kampaña di asesinato i sekuestro. E por wòrdu kondená na bida largu den prizòn si e wòrdu deklará kulpabel den un huisio ku por dura vários siman i lo start den novèmber.
Outoridat ta hustifiká e medidanan fuerte di seguridat pa Guzman debí ku el a skapa dos biaha di prizòn na Mexico. Den su segundo eskape, “El Chapo” a hui via un tùnel di 1,6 kilometer largu ku a wòrdu kobá te na e sitio kaminda e tabata den su sèl.
