LOS ANGELES, AP.- E sistema di trein supteraneo di Los Angeles lo ta e promé pa instalá skènernan di kurpa kompletu pa asina revisá si e pasaheronan ta karga arma òf eksplosivo, segun indikashon di funshonarionan djamars.
Outoridat Metropolitano di Transporte di Kondado di Los Angeles i e Atministrashon di Seguridat den Transporte, TSA, a tèst vários diferente tipo di skèner di kurpa kompleto durante alrededor di un aña.
E skènernan pa wòrdu usá ta portátil, i ta revisá e pasaheronan ku drenta e stashon kompletamente.
E mashinnan, ku ta skèn ophetonan di metal i no metalnan na kurpa di e hende, por detektá artíkulonan sospechoso na un distansia di nuebe meter i por skèn 2.000 pasahero pa ora. Asina Brian Hass, bosero di Outoridat Metropolitano di Transporte di Kondado di Los Angeles a bisa.
Den febrüari, TSA aprobá skènernan den e stashon Penn di New York. Ademas di esaki, a realisá pruebanan den e stashon Union na Washington i den un stashon na New Jersey durante Super Bowl 2014.
Den desèmber, un inmigrante di Bangladesh a heridá su mes purbando di sende un bòm trahá na kas armá na su pechu. Esaki a pasa den un supteraneo serka di Time Square den siudat di New York.
Outoridat di Transporte di Los Angeles a tèst vários tipo di skèner di kurpa kompletu, inkluyendo sistemanan di aeropuerto, kaminda e pasaheronan ta kana pasa via e skèner. E programa piloto mester evaluá e presishon i potensial di e mashinnan aki.
Alrededor di 150.000 pasahero ta usa metro komo un forma alternativo pa biaha tur dia di nobo. Aña pasá, 112 mion biahe di trein a wòrdu realisá, segun e sistema di trein supteraneo.
