MADRID, AP.- Un hues di Oudiensia Nashonal di Spaña a dekretá djaweps ku nuebe integrante di e gobièrnu katalan lo wòrdu manda prizòn pa posibel kargonan di rebelion i malversashon pa deklará independensia den e region.
Den e kaso di eks konsehero Santiago Vila, e hues Carmen Lamela a diktaminá ku e por keda liber si e paga un fiansa di 50.000 euro i lo keda den prizòn te ora e depositá e montante aki.
Ademas di e eks visepresidente di Generalitat, Oriol Junqueras, otro eks konseheronan sentensiá ta Jordi Turull, eks bosero di presidensia katalan; Raul Romeva, eks konsehero di eksterior; Josep Rull, asuntunan teritorial; Dolors Bassa; Meritxell Borras, kultura, Joaquim Forn, interior, i Carles Mundo di Hustisia.
Un fiskal spañó a pidi Oudiensia Nashonal pa emití un òrdu di detenshon internashonal kontra e lider katalan, Carles Puigdemont, i kuater di su eks ministernan.
Puigdemont a biaha pa Bèlgika ku algun eks minister, afirmando ku e ta buskando “libertat i seguridat”. E di kuater eks funshonario a keda den e kapital belga djaweps miéntras nuebe eks konsehero katalan a paresé na Madrid, kaminda e sentensia a wòrdu diktá.
