NEW YORK, AP. Despues di hui for di prizòn na dos okashon, Joaquin “El Chapo” Guzman tabata e hòmber mas buská na mundu. E posibilidat pa wak e personal a kombertí den un atrakshon turístiko pa diferente espektador ku ta akudí korte di Brooklyn kaminda e kapo di droga notorio ta enhuisiá.
Vários turista i estranhero ta akudiendo e galeria públiko di tribunal federal di Brooklyn, pa por mira e narkotrafikante ku por wòrdu sentensia pa pasa restu di su bida tras di trali. Su kasá, Emma Coronel, ta akudí e galeria kasi tur dia.
Guzman a wòrdu ekstraditá aña pasá pa enfrentá kargonan ku ta akus’é di enkabesá e kartel di Sinaloa, kual a hasi kontrabando toneladanan di kokaina pa Merka.
E seis simannan di testimonio di agentenan polisial, un trafikante di kokaina kolombiano enkarselá i delinkuentenan mehikano a ofresé sufisiente material pa vários script di “Miami Vice” òf “Narcos”.
Tabatin relatonan di tùnelnan klandestino bou di tera na frontera, intentonan di asesinato, soborno na komandantenan polisial, djètnan priva ku miónes kèsh i fábrikanan ku tabata produsí kònteiner di pika yen di kokaina.
E abogadonan di Guzman ta insistí riba su inosensia, afirmando ku e kolaboradornan simplemente ta gañando pa haña un kondena mas leve.
