BUDAPEST, HUNGRIA, AP.- Outoridat di Hungria a bisa djaluna ku ta kompletando e preparashonnan pa kuminsá ku e rekuperashon difísil di un boto di turista ku a senk den Riu Danubio.
Ainda tin ocho persona pèrdí, despues di e dalmentu riba 29 di mei entre e boto i un barku krusero Viking Sigyn na altura di brùg Margit na Budapest.
Te ainda a konfirmá morto di 19 turista surkoreano i un tripulante hungaro. Solamente shete persona a wòrdu reskatá.
E bosero di reskate, Nandor Jasenszky, a bisa ku sambuyadónan a pone kuater chup pa subi e boto Hableany i ku e otro areglonan tékniko i di seguridat ta pendiente. Ya tin un kran na e sitio di e aksidente pa sostené esfuersonan pa saka e boto for di awa.
Jasenszky a bisa ku e sambuyadónan lo buska mas kadaver den e boto ora ku esaki ta mas serka di superfisie.
Polis di Budapest lo kontinuá ku investigashon di e kaso na momentu ku e barku wòrdu saka for di awa.
E akshonnan di búskeda i rekuperashon a wòrdu kompliká pa e nivel haltu di awa den Danubio, aparte di su koriente fuerte i visibilidat praktikamente nulo bou di awa.
E kapitan di e krusero ta detené for di 1 di yüni. E ta wòrdu demanda ku pone transporte riba awa na peliger i kousando un aksidente ku diferente fatalidat.