TEHERAN, AP.- Teheran a ataká ku rakèt di tera un base aéreo di Irak kaminda tin trupanan merikano, esaki den forma di represaya pa e asesinato di un general iraní haltu na man di Merka, asina televishon estatal iraní a informá.
Ta trata di un vengansa pa e morto di general di gueria revolushonario Qassem Soleimani asina e televishon a bisa.
No tabata posibel haña kontakto ku forsanan merikano pa sa nan komentario. E base Ain Assad ta keda den e provinsia oksidental irakí di Anbar. E trupanan merikano ta usa esaki pa promé bes despues di nan invashon na 2003 kaminda a tuma e diktador Saddam Hussein i posteriormente a bolbe einan pa kombatí e grupo di Estado Islámiko na Irak i Siria.
Pentágono na su turno ta bisa ku mas di un dosein di misil balístiko a keda tirá for di Iran kontra di dos base merikano na Irak.
E operativo yama Martir Soleimani, segun televishon iraní. E divishon aero-espasial di guardia revolushonario ku ta kontrolá e programa di misilnan di Iran a hasi e atake. Teheran a bisa ku e lo divulgá mas informashon despues.
Anteriormente guardia revolushonario di Iran a atvertí Merka i su aliadonan regional pa no tuma represaya pa e atake ku misil, segun un komunikado di e agensia di notisia estatal IRNA.
“Nos ta atvertí tur aliado merikano ku a duna nan base na ehérsito terorista ku kualke teritorio ku sea e punto di inisio di aktonan agresivo kontra Iran lo keda ataká”, asina guardia revolushonario a bisa i ku tambe a menasá Israel.
