TEHERAN (AP).- Iran ayera a atvertí ku e tin e kapasidat pa destruí basenan militar den serkania i ataká Israel apénas minütnan despues di risibí kualkier atake den su teritorio, den un refleho nobo di e tenshonnan kousá pa su programa nuklear, ku Oksidente ta konsiderá sospechoso.
E menasa a wòrdu hasí durante un ehersisio militar ku a inkluí e lansamentu di misilnan di guera. Guardia Revolushonario Iraní, ku a kondusí e maniobranan den e desierto sentral iraní, a bisa ku e proyektilnan a wòrdu tirá kontra blankonan ku a simulá basenan militar stranhero.
Israel i Merka a insinuá e posibilidat di lansa atakenan militar kontra Iran si e sanshonnan i diplomasia no para e programa di desaroyo nuklear iraní. Oksidente ta sospechá ku Iran por tin e intenshon di produsí armanan nuklear. Teheran ta insistí ku e tin solamente propósitonan pasífiko.
E agensia di notisia semiofisial Farse a menshoná general Ami Alí Hajizadah, di a bisa ku tin basenan merikano na alkanse di e misilnan iraní i ku nan lo por wòrdu ataká komo represaya. A referí na Israel komo ‘teritorionan okupá’.
‘A tuma medidanan pa por destruí tur e basenan aki den e promé minütnan despues di un atake’, asina Hajizadeh, direktor di e divishon aeroespasial di e Guardia a afirmá.
Outoridatnan israelí a nenga di formul á deklarashonnan. Merka tampoko a reakshoná mesora.
Hajizadeh a bisa ku e Guardia ku éksito a tèst un misil ku lo por senk barkunan merikano den Golfo Pérsiko. El a bisa na televishon estatal ku e misil tin un alkanse di 300 kilometer.
E Quinta Flota di Merka tin su base na Bahrein, un nashon insular den Golfo na 200 kilometer di Iran.
Iran a bisa djamars ku tambe el a lansa vários misil durante e ehersisionan, inkluso Shahab- 3 ku alkanse di 2.000 kilometer.
