TEHRAN, IRAN, AFP.- Iran a rechasá e akusashonnan di Merka ku e pais ta yudando Venezuela rekonstruí su industria di petroli a kambio di oro. El a agregá ku Washington kier daña e relashon komersial entre ámbos pais.
E diplomátiko merikano prinsipal ku ta atendé asuntunan venezolano, Elliot Abrams, a deklará djaweps ku “Iran ta hungando un ròl kada biaha mas grandi” den Venezuela.
“Nos a nota kon Iran a manda mas i mas avion pa Venezuela, partikularmente e siman aki. I nos ta kere nan risibí pago den forma di oro. E avionnan ta sali Iran yen di ekipo pa e industria di petroli i ta regresá bek ku oro”, asina Abrams a afirmá.
Merka a apliká sanshon riba eksportashon di krudo di Venezuela pa Iran, i vários persona den gobièrnu i militarnan di ámbos pais.
Tehran a indiká ku e akusashonnan di Abrams “ta infundá” sin duna kontesta riba e akusashon di oro. Washington ta purbando di oumentá “preshon riba e gobièrnu di Venezuela i interumpí komersio entre Iran i Venezuela”.
