TEHRAN, IRAN, AFP.- Iran a pidi e gobièrnu nobo di Merka pa anulá e sanshonnan imponé pa Donald Trump “inkondishonalmente” pa salba e akuerdo nuklear di 2015.
Dos dia despues ku Joe Biden a drenta Kas Blanku, e minister di eksterior di Iran, Mohammad Javad Zarif a publiká un editorial den e revista ‘Foreign Affairs’ di Merka, ekspresando su opinion relashoná ku e akuerdo aki.
Eks presidente Donald Trump a sali unilateralmente di e akuerdo aki na aña 2018 i a imponé sanshonnan fuerte kontra Iran.
E akuerdo ta entre Iran, Merka, China, Rusia, Bretaña, Fransia i Alemania i ta konosí komo “Joint Comprehensive Plan of Action (JCPOA). E plan ta suavisá tur sanshon kontra Iran si e pais garantisá ku e lo no konstruí un bòm atómiko.
Iran a suspendé tur kumplimentu for di 2019 pa motibu ku Washington a bandoná e akuerdo. Pero e gobièrnu ta dispuesto na traha ku Biden, kende a inougurá ofisialmente riba 20 di yanüari i ekspresá su disponibilidat pa traha bèk ku Tehran.
