HERUSALÈM, AP.- Promé minister israelí Benjamin Netanyhau a emití un diskurso pa desmentí un serie di akusashon di korupshon den su kontra.
Netanyahu a bisa ku ta “inhustu” pa e wòrdu akusá promé ku elekshon di 9 di aprel sin ku e ta risibí e oportunidat di duna aklarashon riba e akusashonnan den su kontra. El a señalá ku outoridat a ninga su petishon pa konfrontá e testigunan di estado personalmente i a ofresé pa hasi esaki bibu via un transmishon bibu. “Ta dikon boso tin miedu? Ta kiko boso ke skonde?”, asina el a puntra.
Polis a rekomendá pa akusá Netanyahu pa un serie di kargo derivá di tres investigashon pa korupshon. Ta dependé di fiskal Avichai Mandelblit, pa disidí si ta presentá un demanda òf no. E fiskal general a wòrdu nombra pa Netanyahu i no ta evidente si esaki lo wòrdu hasi promé ku elekshon.
Netanyahu a ninga e delito i a deskribí e investigashon komo un ‘witchhunt’ organisá pa su rivalnan polítiko i prensa. El a indiká ku e lo no bandoná di kampaña di reelekshon, ademas e lo no renunsia su kargo si e wòrdu sentensia.
Prensa israelí a kubri e diskurso, transmitiendo esaki bibu via kadenanan prinsipal.
