HERUSALEM, AFP.- E minister di eksterior di Israel, Yair Lapid a presentá un plan pa “mehorá” kondishonnan di bida di palestinonan di Gaza Strip.
E minister a proponé un plan di dos fase, pero sin negoshá ku Hamas, e organisashon ku ta goberná Gaza Strip.
Durante e promé fase lo “drecha tur liña eléktriko, konektá gas i un planta di awa” na Gaza. E teritorio tin mas di 15 aña bou di kontròl di Israel i tin alrededor di 12 ora di koriente pa dia i skarsedat di awa limpi.
A kambio di e plan, Hamas mester primintí ku lo trese trankilidat riba término largu, segun indikashon di Lapid.
Durante e segundo fase lo konstruí un haf i konstruí kareteranan entre Gaza i Wèst Bank, un teritorio palestino okupá pa Israel. lo konstruí un zona industrial nobo tambe.
E plan no ta pa resolvé e konflikto palestino-israelí. E ta pa “aktua awor” i “mehorá” kondishon di bida di palestinonan, segun indikashon di e minister.
Israel i Hamas ta den guera for di aña 2008. Ainda no a kuminsá rekonstruí Gaza Strip despues di kuater luna di guera despues di e último guera, den luna di mei.