WASHINGTON, AP.- Jerome Powell a wòrdu huramentá djaluna komo presidente nobo di Reserva Federal, primintiendo pa kontinuá ku e polítikanan ku a sòru pa un kresementu ekonómiko i un merkado laboral sólido.
Powell a wòrdu huramentá ku un seremonia kòrtiku den e sala di konferensia di banko sentral merikano, un dia despues di a kumpli 65 aña. Algu despues el a ofresé un mensahe riba video.
Powell lo remplasá Janet Yellen, kende tabata e promé muhé pa dirigí Fed. Presidente Donald Trump a skohe Powell i a ninga di ofresé Yellen un segundo periodo di kuater aña.
Den su mensahe riba video, Powell no a menshoná e turbulensia aktual den merkadonan finansiero. Sinembargo, el a sigurá ku e direktiva di banko sentral “lo sigui vigilá e situashon di serka i nos ta dispuesto na rospondé na e riesgonan ku lo sigui surgi”.
Powell, kende tabata den direktiva di e banko desde 2012, a wòrdu skohé pa Trump dia 2 di novèmber despues di un proseso di selekshon públiko. E nombramentu a wòrdu aprobá pa Senado algun dia pasá pa un periodo di kuater aña ku mester terminá den febrüari 2022. E periodo aktual di Powell komo integrante di e hunta direktiva di Fed lo terminá dia 31 di yanüari 2028.
