GAZA, PALESTINA (AFP).- Den e hospital di Al Chifa, ku a keda redusí na un ruina despues dje kombatenan entre Israel i Hamas, e identifikashon di kadavernan ta un kalvario nobo pa e servisionan di emergensia palestino i e famianan na un sitio di Gaza kaminda awor aki ta morto so a sobra.
“Nos tin mester di material nesesario i e tempu ta kontr’i nos. Nos mester kaba promé ku e kurpanan deskomponé”, segun Aliwa, hefe di servisio di urgensia dje hospital.
E hospital di Al Shifa tabata esun prinsipal di Gaza, ku 700 kama. Organisashon Mundial di Salú a denunsiá ku e delaster operashon militar israelí a laga e hospital manera “un kaska bashí” ku hopi kadaver.
Ehérsito israelí a lansa un atake formal riba e hospital durante di dos siman i a argumentá ku e meta tabata pa buska “kombatientenan” dje movementu islamita palestino Hamas.
Potrètnan ta mustra ku e edifisionan dje hospital a keda kompletamente destruí, miéntras ku tabata karga saka kadavernan.
Segun testigunan, e forsanan israelí a dera desena di morto, segun Mahmud Basal, bosero dje Departamento di defensa Sivil di Gaza. E enfermera Maha a akudí na e sitio pa buska su kasá, e dòkter Abdel Aziz Kali, kende nan a pèrdè for di bista for di despues ku a arest’é den e hospital.
E enfermera a relatá ku e tabata presente na momento dje asalto di tropanan israelí i ku e sòldánan tabata tira riba tur entrada, loke a stroba e hendenan di por a hui.
Miéntras ku algun pashènt dje hospital por a sali, otronan a keda atrapá durante dje bombardeo. E último atake riba e hospital a kuminsá 18 di mart i a kaba na komienso di aprel, despues di kua ehersisio israelí a anunsiá di a mata mas di 200 terorista i a haña hopi arma den e hospital.
