BOGOTA (AFP).- E eks-presidente kolombiano Alvaro Uribe (2002-2010), un dje polítikonan mas influyente dje siglo aki den e pais, lo keda hibá un korte penal pa supuesto manipulashon di testigunan den un investigashon riba su partisipashon den gruponan paramilitar.
“Ku pruebanan, un fiskal delegado dilanti di Korte Supremo di Hustisia a presentá e akusashon kontra dje eks-senador Alvaro Uribe Velez komo akusado di delitonan di soborno di testigunan i froude di proseso”, segun ministerio públiko a bisa den un komunikado, sin presisá pa ki tempu e kaso lo tuma lugá. Ta e promé ku e eks-presidente di 71 aña lo enfrentá.
Uribe semper a defendé su inosensia, pero awor ta kore riesgo di haña un kastigu di te ku 8 aña di prizòn den un proseso ku e mes a start i ku awor a bira un búmeran hudisial.
Tur kos a kuminsá den 2012, ora ku e senador dje tempu ei a presentá un denunsia kontra dje kongresista di iskierda Iván Cepeda, kende el a akusá di un supuesto kòmplòt ku testigunan falsu pa relashoná ku gruponan militar ultra derecha, responsabelnan di violashon di derechinan humano den su guera klandestino kontra di guerianan di iskierda.
Pero Korte Supremo no solamente a disidí na husga Cepeda, sino ku den2018 a kuminsá investigá e eks-presidente. E tribunal a sospechá ku tabata Uribe, i no su opositor, kende a trata di manipulá testigunan.
E huesnan a bai mas leu i den ougùstùs di 2020 a ordená aresto na kas pa e eks-presidente, miéntras ku e investigashon tabata avansá.
