RIO DE JANEIRO, AP.- Un kandela a kima un hospital na Rio de Janeiro i a obligá e personal pa saka e pashèntnan riba kaya i a provoká por lo ménos 11 morto, segun informashon di outoridat djabièrnè.
E kanal di televishon a mustra e personal médiko atendiendo ku e pashèntnan riba kaya, algun den ròlstul i otronan riba kama òf paña riba suela, promé ku nan a keda transferí pa un sitio safe. Entre e personanan reskatá tabatin ansiano i pashèntnan di kuido intensivo.
E empleadonan a saka algun ekipo médiko riba kaya miéntras huma tabata bai laira. E kandela a wòrdu deklará djaweps anochi.
Kuater bombero a keda hospitalisá despues di kombatí e kandelanan di Hospital Badim den oranan di anochi i mas o ménos 90 pashènt a wòrdu transportá pa un otro hospital, segun e departamento di bombero. Outoridat ta investigando e kousa di e kandela.
E alkalde di Rio, Marcelo Crivella, a bisa ku 11 persona a muri. El a bishitá e hospital djabièrnè mainta i a deklará tres dia di luto.
Un trahadó sosial i otro empleadonan ta yudando famia di e pashèntnan, segun indikashon di e hospital djabièrnè.