WASHINGTON (AP).- Presidente Donald Trump lo bai riba e stul kayente, esei pa motibu ku mayoria den Kas di Representantenan Merikano a disidí ku e lo kuminsá ku e proseso di loke den e sistema hudisial merikano nan konosé komo “impeachment”, pues ku tin un akusashon pa e ser di ‘dagvaard’, manera nos konosé den nos sistema hudisial. Esei ta un desishon ku a kai ayera nochi den Kas di Representantenan unda Demókratanan tin mayoria. Ku esaki Presidente Trump a bira e di tres Presidente ku formalmente a ser akusá bou di e Konstitushon pa un òf mas delito kometé.
E votashon históriko aki a bini klaramente dividí bou di partidonan, pero meskos ku e nashon ta dividí kaba, alegando ku e presidente aki a abusá di su poder den ofisina entre otro dor di reklutá un gobièrnu ageno pa investigá un rival polítiko ku ta den e kontienda pa elekshon di 2020. Mas aleu tambe Kas di Representante a vota riba e kargo ku el a opstruí hustisia den su trabou pa hasi investigashon.
Ku e akusashon aki kontra Presidente Trump, ta nifiká tambe ku e kaso lo bai awor pa Senado pa e ser tratá i husgá. Si Trump ser deklará no-kulpabel dor di mayoria den Senado, loke ta di spera tambe, e lo tin di bai reelekshon ku un peso pisá riba su lomba i meimei di un periodo presidensial yen di kontroversia.
