WASHINGTON, MERKA, AFP.- Joe Biden a keda konfirmá komo e próksimo presidente merikano djaluna despues ku Kolegio Elektoral a formalisá su viktoria, serando tur porta pa Donald Trump revoká resultado di elekshon e aña aki. Biden, kende a fungi komo vise presidente di Barack Obama lo bira e di 46 presidente pa goberná e nashon.
“Demokrasia a prevalesé. Nos a vota i e integridat di nos elekshon a keda intakto”, asina Biden a bisa djárason. “A yega ora pa nos bòltu e página i uni i sana. Mi lo sirbi komo presidente pa tur merikano”, asina el a agregá.
Ounke ku Biden a gana den elekshon di 3 novèmber, Trump ta sigui bisa ku e ta e ganadó berdadero, sin duna prueba pa esaki. Mayoria korte e ninga di aseptá demanda di Trump indikando ku e votamentu tabata froudulento.