BRASÍLIA, BRASIL, AFP.- E Tribunal Superior di Hustisia (STJ) di Brasil a konfirmá ku a suspendé e gobernador di Rio de Janeiro, Wilson Witzel akusá ku korupshon den e sektor di salú durante e pandemia di Corona vírus.
Un korte spesial di 15 hues a forma mayoria voto pa garantisá petishon di un otro hues pa suspendé e gobernador. E retiro di Witzel ta bálido pa 180 dia miéntras e ta warda riba un desishon definitivo.
Segun e denunsia di Fiskal, Witzel a krea un kuenta separá pa haña soborno di empresanan. Ademas, outoridat ta investigando froude relashoná ku e maneho di hospitalnan temporal ku a keda konstruí i tambe e kompra iregular di mashinnan di hala rosea i remedi. Segun e akusashon, Witzel a haña 50 mion dòler pa e transakshonnan froudulento.
Witzel ta rechasá tur akusashon i a bisa ku su kaso ta un persekushon polítiko motivá pa un konfrontashon públiko ku presidente Jair Bolsonaro.
